Subscribe:

Ads 468x60px

18 May 2008

ऐनामा मेरो देश (कविता)



- सुरेश सुवेदी


यात्रामा
समस्याका अग्ला-अग्ला
सगरमाथाहरू उभिन सक्छन्
अशान्तिको बादलसँगै
दुःखका असिनाहरू बर्सन सक्छन्
षड्यन्त्रका
चट्याङहरू खस्न सक्छन्
कतै
कलेजो छिया-छिया हुनेगरी
सुस्ताहरू छटपटाउन सक्छन्
कतै एकताको जग हल्लनेगरी
राष्ट्रघातीहरू सलबलाउन सक्छन्
खबरदार
नयाँ जिन्दगी
नयाँ विश्वास
नयाँ रङ
नयाँ समय
नयाँ सत्यसँगै
खोलेर चेतनाको भोटेताल्चा
विवेक र विचारको साँचोले
चिहानबाट चियाइरहेका
सहिदहरूको नाममा
शान्तिको दुबो उमारेर
अक्षरको रमाइलो पिङमा
बयली खेल्दै म
यो देशको
लाली गुराँस फुलेको
रातो कविता लेख्‍न चाहन्छु
बगरका ढुङ्गामा लतपतिएका
रगतका सिर्का पखाल्दै
फूलको बास्नामा मिसिएर
कहालीलाग्दो तस्विर मेटेर
नयाँ क्यानभासमा
नयाँ तस्वीर उतार्न चाहन्छु
परिवर्तनको नयाँ मोडमा
सुन्दरी युवतीको स्नेहले
लोलाएका नयाँ आँखा होइन,
विश्वको मानचित्रमा
छाती फुकाएर हाँसिरहेको
मेरो देशको ऐनामा
एकपटक म
मेरो नयाँ अनुहारले
हेर्न चाहन्छु ।

भोजपुर, हाल: काठमाडौँ ।
disubhai@yahoo.com

1 comment: