March 20, 2010

गिरिजापछि ?

गिरिजाप्रसादपछि के ?,  को ?  र  कसरी ?
प्रश्‍न जसरी पनि गर्न सकिन्छ ।
तर जवाफ दिन गिरिजाप्रसाद जस्तो निर्भीक र स्पष्‍ट अडान भएका मानक नेता नेपाली राजनीतिक मञ्चमा कोही छैन ।

शनिबारको फुर्सदिलो सप्‍ताहान्तमा नेपालीजनका साथै नेपालप्रति चासो राख्‍ने विश्‍व-जनमानसको मथिङ्गललाई बेफुर्सदी पार्दै मध्याह्‌न १२ बजेर १० मिनेट जाँदा काङ्ग्रेस सभापति तथा नेपाली राजनीतिका शिखर व्यक्तित्व कोइरालाको ८६ वर्षको उमेरमा निधन भयो । भोलिको राजनीतिक निकासको आशाका केन्द्र उनै थिए । मियोविहीन राजनीतिक आँगनमा अब जे पनि हुन सक्छ । भद्रगोल हिसाबले दाइँ चल्न सक्छ । ब्रेक नभएको जिब्रोधारी चालकहरूको बाहुल्य रहेको राजनीतिक रङ्गमञ्चमा आलोचना र आह्रिसको तहमा गिरिजाप्रसाद जतिसुकै हठी र एकोहोरो भन्ने रूपमा चित्रित भए पनि उनको त्यही हठ नै दृढ सङ्कल्पको प्रतीक थियो । जसले उनलाई परिपक्व नेतृत्वका रूपमा स्थापित गर्न विश्‍वासिलो गरी सबैसामु उभ्यायो ।

जीवनको आखिरी घडीमा राजनीतिक प्रतिष्‍ठा र सामूहिक नेताको छवि दाउमा राख्‍दै जोरबलले छोरी सुजातालाई मूलधारको राजनीतिमा लतारेर ल्याएकोमा अपजस खेपे पनि व्यक्तिपिच्छे फरक-फरक दसथरी  कुरा फेर्दै हिँड्ने उनको स्वाभाव कहिल्यै भएन । प्रजातान्त्रिक आन्दोलनको यात्रामा अथकित जुटेको नेपाली काङ्ग्रेस र त्यसमा पनि विगत ६ दशकयता अटुट रूपमा अग्रसर गिरिजाप्रसादको निर्विकल्प नेतृत्व माओवादीलाई शान्ति प्रक्रियामा मनाएर ल्याएपछि झन् चुलिएर आयो ।  लगातार ११ वर्ष पार्टी सभापति र पाँच पटकसम्म देशको कार्यकारी प्रमुख बनेका कोइरालालाई यही नेतृत्वमोहका कारण शक्तिमा रहिराख्‍न जोड गर्ने लालची नेताको रूपमा समेत छड्के आँखाले हेरियो । तर उनको त्यो विशेषतालाई उनी सधैँ सक्रिय रहन मन पराउने भूमिकाप्रेमी राजनेताको रूपमा हेर्नुपर्ने हुन्छ । नभन्दै गिरिजाप्रसाद जीवनको अन्तिम समयसम्मै नेपाली राजनीतिको चर्चा र चासोका बीच भूमिका खेल्ने सक्रियताबीचमै  छाइरहे ।

श्रद्धाञ्जलि नेपाली राजनीतिका यी शिखर पुरुषलाई !

6 comments:

  1. गिरिजापछि अब के हुने हो नेपालको अबस्था हेर्न बाकि नै छ !!!

    ReplyDelete
  2. नेपाली काङ्ग्रेसका सभापति तथा पुर्व प्रधानमन्त्री गिरिजा प्रसाद कोइरालाको देहावासानले देश रोएको दिन, महानायक कोइरालाको म्रितात्माको चीर शान्तिको कामना गर्दै भाव्पूर्ण श्रद्धान्जली अर्पण गर्दछु।

    ReplyDelete
  3. अब भद्रगोल हुन्छ देशमा अनी नेपाली काङ्रेसमा पनी ।
    हार्दिक श्रद्दानजली गिरिजा प्रसाद कोइरालालाई

    ReplyDelete
  4. गिरिजापछि पनि उस्तै हो हुनलाई । बरु श्रद्धाञ्जली गिरिजालाई ।

    ReplyDelete
  5. को भन्ने बिस्तारै देखिएला .... तर उनीले छोडेर गएका बिशाल रिक्तता के र कसरि पुरा गर्ने भन्ने कुरा नयाँ आउने जोसुकैलाई पनि ठुलो चुनौती हुनेछ

    ReplyDelete
  6. घाउँ त लागे पछि पुरिनु पर्ने हो। आशा गरौ नेताको कमी नभएको देशमा चाडे राम्रे हुनेछ।

    ReplyDelete