Subscribe:

Ads 468x60px

23 April 2011

लोकतन्त्र

आऊ, हावालाई पूजौं
गुरू थापौं हावालाई
उसका कुरा बुझौं

देखिन्न स्वाँठ हावा
यसैलाई मानौं अदृश्य शक्ति
राखौं प्रतीकस्वरूप कुनै घडा
आऊ,
हावामा बुरुक्क उफ्रिएर
हावाकै सुसेली काढौं

निर्मम घडीमा
कठोर शासकको गद्दी फ्याँक्न
सडक तात्तिए जस्तै
पहिले-पहिले
बढारेर लैजान्थ्यो हावाले
सडकका फोहोर
खेतका बालीमा गुम्सिएका विषादी
कोठाको कापमा लुकिबसेको ढुसी
यसपाली हावालाई यतै खेलाइराखौं
फोहोरसँगै यतै अलमल्याइराखौं
संसारभरिका रोग, भोक र शोक
यतै थुपार्ने अनुमति दिऔं

हावा हाम्रो रक्त
हामी हावाको भक्त
हावा निचोर्दै निकाल्न
खोलौं घरको झ्याल र ढोका
धुरीमा त्यसै खेर गइरहेछ एक भारी हावा
उद्धार गरेर आँगनमा निकालौं
आँगनबाट आँपगाछीतिर हम्कौं
हावा खाऔं हावा
हावालाई नै पेलेर
तेल निकाल्ने उद्यमशीलता विकास गरौं 
आऊ,
हावाको लागि फूलमाला उनौं
हावाको जयजयकार गरौँ
हावाको छुट्टै राज्य बनाऔं ।

No comments:

Post a Comment