कमाइ

हत्केलाको भावर मैदानमा
आली झैँ उठेका
लहरे नसा

काखीमा
चमेरो झैँ झुन्डिरहने
श्रमको पिरो बाफ

इन्द्रेणीको बर्षादी ओढेको
गोलो पर्वतमुनि
गुफा खन्दै भुलभुलाएको बादल

छातीको बन्द बाकसमा
कसैले पट्याएर छाडे जस्तो
गुनासोको खात-खात स्टकोट

परेलीको छाता ओढेर
आकाशको गस्तीमा सपना पछ्याइरहने
जोर परेवा

के मात्र पो छैन,

राजमार्गमा मस्त फन्का मार्ने
कल्याङमल्याङ योजनाका ट्रकहरूमा
रुँदारुँदै निदाएको छ
अबोध रहर

एक चोक्टा आवाजमा मेट्न भोक
सडकमा दादा भइहिँडेकै हो
                            - क्रान्ति

के पो छैन
हामीसँग,

हामीले हाँक्दै आएको रथमा
यतिखेर
हाम्रो लगाम त हो नभएको !

लगाम खिच्न बाँकी रहँदै -
हत्केलाको भावर मैदानमा
आली झैँ उठेका
यी लहरे नसा ... ।