Nepal Smiles 😄

हाँसो र खित्का ओठबाट ताछिएर इन्टरनेटको च्याट एप्लिकेसनभित्र ‘स्माइली’ र 'इमोजी'मा खुम्चिएको समय हो यो। आजका मान्छेहरू सायद हाँसोको कुरा बढी गर्छन् र हाँस्छन् चाहिं कम। यस्तो वेला आफूले खिचेका फोटोहरूको अर्काइभ खोतलेर मुस्कान सिरिज तयार पार्दै छु।

खासगरी पोट्रेट फोटोग्राफीमा रमाउँदै आएको छु। मान्छेका मुहारमा तैरिएको र सिङ्गो शरीरले बोलिरहेको भाषाको भाव उतार्न निकै मजा लाग्छ। खुसी, पीडा, बेचैनी, विस्मात्, उत्साह लगायतका भाव पोखिरहेका अनुहारले ती मान्छेको जिन्दगीको पछिल्लो कथा भनिरहेको हुन्छ।

नेपालीहरू सीमित स्रोत-साधन र अभावमा पनि ‘सन्तोकी’ भनेर चिनिन्छन्। दुःखलाई छातीमा सिएर मुस्काइरहेका हुन्छन्। दैनिक १७ सयभन्दा बढी नेपाली युवा विदेशिनुलाई त्यही हाँसोको खोजी मान्नुपर्छ। हामी नेपाली मेकअप बिग्रेला र मुखका कुनामा मुजा बस्ला वा दुख्ला भनेर नहाँसी बस्नेमध्येमा पर्दैनौं। सानै कुराले ओठ खुल्छन्, आँखा तान्किन्छन्। अस्थिर राजनीतिले मक्किएको देशमा सबै क्षेत्रमा बेथिति-अव्यवस्था भए पनि  हिलोमा फुलेको कमल जस्तै हामी सबथोक सहेर, पचाएर, चित्त बुझाएर बाँचिरहेका छौं । हाँसिरहेका छौं।

मुस्कान र हाँसो सिरिजका यी तस्बिरलाई यही कुराको सूचक मानौं। विभिन्न समयमा आफ्नो गाउँघरका साथै फरक गाउँठाउँ पुगेका वेला खिचिएका यी तस्बिरमा मुस्कानदेखि खित्कासम्मको आयतन नापिएको छ।

 

 

 

 

 

 

 

 

 

 

 

 

 

 

 

र अन्त्यमा, यसमा पनि हाँसोको थोपा चुहिएको देखें मैले