... फलानोलाई !

आज मेरो माया
छातीको आरनभित्र नअटाएर
खोइ कहाँ पो फाल हानेर गयो

पाइन चढाउनु थियो यसमा तिम्रो मायाको
घोट्नु थियो चकमक जस्तै
आफ्नो एक थान सादा कलेजी

देशको सपना र सुस्केरादेखि बेखबर
बेपत्ता नागरिक झैं,
नदेखिने ईश्वर र गुपचुप तस्कर झैं
यस्तो ऐजन ऐजन भएछ आज माया

तिम्रो आँखामा डुब्यो भनूँ त
त्यहाँ
कचौरा-कचौरा
खडेरी छ

अलि माथि
त्यो केशराशिमा अल्झिराखेको सम्झूँ त
सपाट सिउँदोको वारपार सडक छ

बसाइ सर्दै
तिम्रो दैलोसामु आएको मानूँ त
त्यो मुटुको गुलाबी चौबन्दीमा
गाँठोहरू छन्

आज मेरो माया
यो मुटुको हारमोनियम भत्काएर
कुन सुर खोज्न गयो ?

जानुअघि मेरो मायाले
तिमीसँग आपतकालीन बैठक गरेन
माया आत्मनिर्भर भएर गयो
गजब भयो !