‘हिँड्नुअघि’मा कवि सुको साइबर

पाहुनाको कलमलाई क्याफेमा प्रस्तुत गर्ने क्रममा 'अतिथि आसन' स्तम्भमा यसपालि कवि सुको साइबरलाई लिएर आएको छु । सुको अर्थात् सुदिप कोइराला । कवि साइबर मेरा समकालीन हुन् । उनको कवितामा मैले सधैँ अनुभूति गर्ने पाटो अभिव्यक्ति शिल्पमा बिछट्टै नयाँपन नै हो । सरल विषयवस्तु र कथ्यमा गम्भीर चाबुक दिनु साइबरको कलमको जग हो । यो एउटा कविको लागि (जो कोही लेखककै लागि) अपेक्षित गुण हो । यसैले समकालीन युवा कविहरूको भीडबाट कवि सुकोलाई नै अतिथिको रूपमा उभ्याउन मलाई लोभ लाग्यो । उनी हाल नयाँ कविताकिताब प्रकाशन तयारीका लागि कविताहरूको जोरजाममा लागेका छन् । निकट भविष्यमै उनको कृति आउँदैछ । त्यो उनको गन्तीको हिसाबले दोस्रो र एकल लेखनको हिसाबले पहिलो किताब हुनेछ ।

कविता लेखनमै समर्पित रहँदै आएका उनको एउटा ताजा कविता क्याफेमा प्रस्तुत छ :

हिँड्नुअघि

घामले पोल्न सक्छ

पानीले निथ्रुक्कै रुझाउन सक्छ

बाटोमा

धुलो उड्न सक्छ

बाटो

हिलो हुन सक्छ

बाटो हो

कसैले

नछोड्न सक्छ

कसैले

छेक्न सक्छ

कसैले
घचेट्न सक्छ

ठोकिन सक्छ

ठेस लाग्न सक्छ

हिँड्ने-नहिँड्ने

हिँड्नुअघि नै सोच्नुपर्छ

हिँडिसकेपछि हिँड्नैपर्छ

फर्कँदा

बाटो उही हुन्छ

तर

हिँड्ने मान्छे

बदलिसकेको हुन्छ ।